Shahadat Imam Hassan (as)
Safar ka maheena ahl-e-bait (as) ke chahne walon ke liye gham aur andoh ka maheena hota hai. Isi silsilay mein maheenay ke aakhri ayyam mein Hazrat Imam Hassan Mujtaba (as) ka rooh-e-parwar aur dardnaak yom-e-shahadat manaya jata hai. Aap (as) na sirf Rasool-e-Khuda (PBUH) ke nawasa-e-akbar hain balkay Panjtan-e-Pak ka woh azeem hissa hain jinhon ne Islam ki baqa ke liye be-misaal qurbani di.
1. Imam Hassan (as) ki Shahadat Kab Hui?
Tarikh-e-Islam ki most authentic riwayaat ke mutabiq, Imam Hassan Mujtaba (as) ki shahadat 28 Safar ko 50 Hijri (ya baaz riwayaat mein 49 Hijri) mein waqei hui. Aap (as) ki umr is waqt sirf 47 saal thi.
2. Shahadat Kese Hui aur Qatil Kaun Tha?
Imam Hassan (as) ki shahadat zehr ke zariye hui thi. Waqt ki hukumat ke waqt ke qatil hukmranon ki saazish aur unke laalach ke tehat, Imam (as) ki biwi Ja’da binti Ash’ath ko yeh yaqeen dilaya gaya ke agar woh Imam Hassan (as) ko zehr dengi toh unki shadi hukumat ke ek ahem fard se kar di jayegi aur unhe bhari maal o daulat di jayegi.
Ja’da ne is saazish ke tehat Imam Hassan (as) ko peenay ke pani ya doodh mein saktareen zehr mila kar diya. Jab yeh zehr Imam (as) ke jism mein utra, toh aap (as) ka meda aur aantien kat gayin aur aap (as) ne khoon ki ultiyan kin. Is dardnaak takleef ke sath aap (as) apne khaliq-e-haqiqi se ja mile.
3. Imam Hassan (as) Kahan Dafan Hain?
Aap (as) ki Wasiyat thi ke aap ko apne nana Rasool-e-Khuda (PBUH) ke qareeb dafan kiya jaye. Lekin jab Ahle-Bait (as) aur Banu Hashim janaza lekar Roza-e-Rasool ki taraf barhe, toh mukhalif afraad ne hathiyaron ke sath rukaawat khari kar di aur teeron ki barish ki (yahan tak ke janaze par kai teer lagay).
Fasad aur mazeed bay-hurmati se bachne ke liye, Imam Hussain (as) ne apne bhai ki wasiyat ke mutabiq unhein madina ke mashhoor qabristan Jannat-ul-Baqi mein unki dadi (Bibi Fatimah bint Asad as) ke pehlu mein dafan kiya.